Apr 20, 2014

Visari-Lorit: ‘Gjërat kanë ndryshuar’

Banorëve në shtëpi u është vendosur muzikë, por ata dukën disi të tërhequr. Jona dhe Matilda, ulur në divan flasin me kode, që të mos kuptojnë të tjerët. Ndërkohë që Lori kërkon pastën e dhëmbëve, duke akuzuar menjëherë Valerin, që ia ka fshehur. Valeri e mohon, duke u betuar se nuk është ai që e ka bërë. Ai nis të kërkojë nëpër dollapë. Lori del në oborr, duke tentuar të flasë dhe të sqarohet me Visarin, për arsye se ai i kishte thënë, se ‘gjërat kanë ndryshuar’. Ajo kërkonte të kuptonte kontekstin, por Visari po e shmangte. Ajo shprehet se situata e dy ditëve të fundit, nuk i ka pëlqyer, madje e ka mërzitur shumë, duke i kujtuar dhe debatin që patën një ditë më parë. Të dy mundohen të sqarohen në lidhje me të, duke u përpjekur të justifikojnë veprimet dhe fjalët. Në tavolinë bashkohen Nevila dhe Juliana, duke i detyruar ta ndërpreresn bisedën mes tyre. Visari largohet, duke u thënë se do të shkojë të bëjë dush. Ndërkohë Lori nis të ngacmohet me fjalë me Valerin.

Përfundon loja e ping-pongut, finalja ndahet mes Valerit dhe Visarit

Ndeshja e parë u luajt mes Katerinës dhe Arditit dhe u fitua nga Arditi. Midis Visarit dhe Valerit, ndeshja e dytë u fitua nga Visari. Loja vazhdoi me ndeshjen e tretë, e cila u zhvillua mes Jonës dhe Nevilës, duke nxjerrë fituese Nevilën. Mes Lorit dhe Julianës, garën e fitoi Juliana. Në pistën e garës u vendosën Enkelejdi dhe Meridiani dhe me gjithë kundërshtimet e Meridianit, garën e fitoi Enkelejdi. Ndërsa mes Mikelës dhe Matildës, ndeshja u fitua nga Mikela. Ata vazhduan të ndeshen me njëri-tjetrin me radhë, derisa finalja u nda midis Valerit dhe Visarit, e cila në fillim u duk sikur do të fitohej nga Valeri, por duke patur kontestime, finalja mes te dyve u përsërit, duke nxjerrë fitues Visarin. Duke qenë se nuk ishin të qartë për fituesin, banorët pritën përgjigjen nga Vëllai i Madh, sipas së cilit fitues ishte Visari dhe shpërblimi i tij ishte... përshesh me kos.

Lojë me top ping-pongu

Mikela lexon zarfin me udhëzimet nga Vëllai i Madh, ku u propozohet banorëve një lojë mjaft e thjeshtë. Banorët do të përballen individualisht me lojën e kalimit të topit të ping-pongut, në vijën e mbërritjes. Banorët duhet të bëjnë kujdes, pasi nuk mund ta prekin, por vetëm ta shtyjnë me frymë. Së bashku me topat e ping-pongut, ata duhet të pajisen edhe me një letër ngjitëse. Me anë të shiritit do të përcaktohet pista e garës. Vija e mbërritjes nga vija e nisjes duhet të jenë jo më pak se 5 metra larg nga njëra-tjetra. Nëse largësia e përcaktuar do të jetë më e madhe, Vëllai i Madh fituesit të garës do t’i japë dyfishin e shpërblimit. E vetmja që duhet të kapërcejë topi i ping-pongut është vija e mbërritjes. Në rast se topi prek vijat anësore, lojtari duhet të fillojë nga vija e nisjes. Gara mes tyre do të bëhet në çifte. Ata do të ndahen në tre grupe me nga 4 lojtarë. Secili nga lojtarët e një grupi duhet të ndeshet të paktën një herë me secilin lojtar të po atij grupi. Gjithsej do të jenë 6 ndeshje në grup. Në mënyrë që lojtarët të ngelen të freskët, do të zhvillohen ndeshjet e para në grupe, pastaj të dytat e me radhë. Kualifikohen për ndeshjet në vazhdim vetëm fituesit e dy vendeve të para në grup. Fituesit e vendeve të para në grupe, do të krijojnë një grup të ri. Po ashtu edhe fituesit e vendeve të dyta. Fituesit e vendeve të para në grupet e reja, do të jenë finalistët të cilët ndeshen për përcaktimin e fituesit të madh. Shpërblimin për këtë lojë do ta marrin në dhomën e rrëfimeve, të cilën mund ta hapë vetëm fituesi i madh. Banorët menjëherë pas leximit të zarfit bëjnë ndarjen e grupeve. Në grupin e parë bënte pjese: Arditi, Katerina, Juliana, Lori. Në grupin e dytë: Visari, Enkelejdi, Meridiani, Valeri. Në grupin e tretë: Matilda, Mikela, Nevila dhe Jona. Pas ndarjes së grupeve, ata nisin të bëjnë si fillim prova paraprake, për t'u njohur me lojën dhe më pas fillojnë.

Vazhdon loja e fshehjes së sendeve; Visari: ‘Të fshehim edhe Valerin, që të gëzohet gjithë shtëpia’

Loja e fshehjeve të sendeve të njëri-tjetrit, duket se i ka argëtuar banorët, pavarësisht kritikave dhe nervozizmit mes tyre. Matilda dhe Visari, vendosin t’i fshehin sende Jonës, duke e nisur me penelin e syve, që sipas Matildës është pika e saj e dobët. Ata dalin në oborr, duke diskutuar se çfarë sendesh të tjera do t'iu fshehin banorëve. Jona iu bashkohet të dyve, duke u bërë dhe ajo pjesë e lojës. Ata hedhin idenë e fshehjes së furçave dhe pastave të dhëmbëve. Gjatë planit të tyre, Visari hedh idenë që ‘të fshehin edhe Valerin, që të gëzohet gjithë shtëpia’. Vajzat qeshin me të madhe, me batutën e Visarit. Pasi diskutuan se çfarë do të fshihnin, Jona shkon të fshehë pastat e dhëmbëve, duke i vendosur sipër frigoriferit, duke vazhduar më pas me fshehjen e sheqerit dhe mjaltin, në bashkëpunim me Visarin. Pas kësaj, ata sillen nëpër shtëpi sikur s’ka ndodhur asgjë, për të humbur gjurmët.

Urojnë njëri-tjetrin për Pashkët; Fajësojnë Valerin për fshehjen e çarçafëve

Banorët mblidhen së bashku, për të drekuar. Gjatë drekës ata urojnë njëri-tjetrin për Pashkët, duke uruar shëndet dhe lumturi. Valeri uron gjithë shqiptarët të gëzojnë Pashkët, jo vetëm ata që janë të krishterë, por edhe ata që nuk e festojnë, duke i uruar shumë fat, shëndet dhe dashuri. Pas drekës, disa prej banorëve shkojnë nëpër dhoma për t'u qetësuar, por shohin se mungojnë çarçafët, dhe nisin të grinden me njëri-tjetrin dhe të pyesin se kush i ka marrë. Lori, shumë e nervozuar, kërkon çarçafët në sallon. Në dhomën e gjumit, Visari pyet se kush i ka marrë çarçafët e tij, duke pyetur Valerin, nëse ishte ai, por Valeri e mohon duke i thënë se dhe atij i mungojnë. Banorët mblidhen të gjithë në dhomë, duke kërkuar secili çarçafët e vet. Lori i kërkon Valerit të nxjerrë çarçafët që i ka fshehur, por Valeri betohet se ia ka feshehur vetëm njërit, por jo të gjithëve. Në dhomë vijnë edhe banorë të tjerë, duke u munduar të gjejnë si kanë rrjedhur ngjarjet me çarçafët. Valeri betohet se nuk ishte ai, ndërkohë Juliana i tregon se ajo i ka fshehur çarçafët e Valerit. Në gjithë kaosin që krijoi fshehja e çarçafëve, banorët duan të dinë se si filloi loja, duke fajësuar Valerin. Ai mundohet të shfajësohet, duke u betuar se nuk ka qenë ai që e ka nisur, por mesa duket askush nuk e beson. Banorët vazhdojnë të grinden me njëri-tjetrin, duke vazhduar kërkimin e çarçafëve. Juliana arrin të gjejë të sajin, dhe grindet me Valerin se ia ka bërë pis, duke e hedhur sipër dollapit. Ai e mohon si fillim, por shumë shpejt pranon se ishte ai që fshehu çarçafët e saj, duke shkuar ta puthë atë në faqe dhe i kërkon të bëjnë paqe. Ndërkohë, Jona duke bërë dush, nuk tregon ende asgjë se si nisi loja...

Loja e Visarit dhe Jonës, ngatërron banorët

Jona dhe Visari vendosin së bashku, të fshehin sende të banorëve nëpër shtëpi. Ata mbledhin gjithë çakmakët si fillim dhe i fshehin, më pas ata shkojnë në dhomat e gjumit dhe fshehin rroba të ndryshme, bashkë me çarçafët. Plani i tyre nisi për të ngacmuar Valerin, kjo pasi Valeri dhe Juliana u grinden për një palë çarçafë që u pëlqenin të dyve. Valeri i kërkonte, duke i shpjeguar se i kishte përdorur vetëm ai, ndërkohë që Juliana i pëlqente për vete. Për të krijuar situata të ndryshme në shtëpi, Jona dhe Visari fshehin çarçafët e Valerit në krevate të ndryshëm. Pasi i fshehin ata vrapojnë në dhomën e tyre, duke bërë sikur bisedojnë, në mënyrë që të humbisnin gjurmët. Valeri shkon në dhomë dhe sheh që mungonin çarçafët e tij. Ai nis të kërkojë nëpër dhomë. Duke qeshur, ai sheh nga kamera, duke i kërkuar ta ndihmojnë me drejtimin e vendndodhjes së çarçafëve. Ai nis të kërkojë sërish. Meridiani vjen në dhomë duke e pyetur se çfarë po kërkonte. Ai i tregon e i kanë fshehur çarçafët, duke ngjitur shkallët për dhomën më sipër. Meridiani nis të qeshë, duke bërë batuta me Valerin. Gjatë asaj kohe, Valeri gjen çarçafët e fshehur ne krevate të ndryshme. Ai qetësisht, nis të heq gjithë këllëfët dhe çarçafët e krevateve, duke i fshehur nëpër dhomë. Ai zbret në dhomën e tij, dhe nis të rregullojë krevatin. Visari i afrohet, ndërkohë që Valeri i tregon çfarë kishte ndodhur. Visari sillej sikur s’dinte gjë, ndërkohë që Valeri e provokon, duke e pyetur nëse ai ishte bashkëpunëtor me ata që kishin bërë lojën, por Visari e mohon. Pavarësisht kundërshtimit të tij, duket se Valeri nuk e besoi. Ai shkon në sallon, duke i thënë Julianës se çarçafët e tij ishin hequr dhe ai i gjeti tek krevati i saj. Ajo ngrihet dhe shkon në dhomën e gjumit , duke nisur të kërkojë këllëfin e jastëkut. Duke mos gjetur asgjë, ajo shkon në dhomën ë Valerit dhe i heq gjithë çarçafët dhe i fsheh në dollapin e Meridianit. Ajo shkon në sallon , duke ia treguar Arditit dhe Katerinës çfarë kishte ndodhur. Nevila kërkon çakmakë së bashku më Katerinën ,e cila nis të nervozohet, pasi nuk i gjenin dot. Ndërkohë Visari dhe Jona shihnin të ulur në sallon, duke mos bërë fjalë.

Thashetheme për Katerinën; Jona e Valeri komentojnë sjelljen dhe paraqitjen e saj

Valeri dhe Jona vazhdojnë të bëjnë thashetheme mes njëri-tjetrit, ndërsa ulen të dy rreth njërës prej tavolinave për të ngrënë mëngjesin. Jona shprehet me fjalë ofenduese teksa fillon të flasë për Katerinën, për të cilën thotë se është debile, ndërsa merr shkas nga idetë që ajo ka dhënë gjatë momentit që është bërë buxheti. Ajo kujton situata nga më të ndryshmet, duke komentuar sjelljen dhe paraqitjen e saj. Jona mendon se Katerina është femra më e shëmtuar nga të gjithë femrat që kanë qenë në Big Brother. Valeri qesh ndërsa dëgjon komentet dhe ofendimet e Jonës, duke e mbështetur për sa i përket komenteve rreth paraqitjes së saj të jashtme. Jona gjithashtu thotë se Katerina shprehet gjithmonë pa u menduara aspak për atë që thotë. “Në gjysmën e situatave pa u menduar flet”, mbështet mendimin saj edhe Valeri. Ajo komenton edhe përballjen që pati Katerina me opinionistitn, duke gjykuar sjelljen e saj gjatë opinioneve që jep.

Jona e Valeri: “Arditi po sillet ndryshe, si efekt i nominimit”

Jona dhe Valeri vazhdojnë të bisedojnë me njëri-tjetrin, teksa Valeri është duke u marrë me larjen e enëve dhe pastrimin e kuzhinës, ndërsa Jona është duke përgatitur mëngjesin për veten. Të dy flasin për Julianën e Arditin dhe marrëdhënien mes tyre. Valeri i tregon se Arditi ka fjetur në të njëjtin krevat me Julianën dhe kjo gjë e çudit Jonën. Të dy mendojnë se Arditi ka filluar të sillet ndryshe gjatë kësaj jave, si efekt i nominimit. Valeri shton se jo vetëm që ka fjetur me Julianën, por ai ka larë enët deri natën vonë, aq sa u ankua për dhimbje mesi. Ndërsa Jona fillon të flasë me ironi për të, duke u shprehur se ai ka edhe katër “vajza” dhe është e çuditshme që e kanë lënë t’i lodhet mesi dhe nuk e kanë ndihmuar. Të dy qeshin pas batutave të njëri-tjetrit, duke folur me siguri për efektin e nominimit tek Arditi, i cili e ka bërë të sillet ndryshe këtë javë.

Jona ia çon mëngjesin te krevati Meridianit, pa Julianën

Valeri është duke u marrë me larjen e enëve, ndërsa pas pak zgjohet edhe Jona. Meridiani ka shkuar të flejë sërish gjumë pas disa minutash, pasi ka përfunduar përgatitjen e mëngjesit për të gjithë banorët. Jona shkon në kuzhinë dhe fillon të merret me përgatitjen e mëngjesit për Meridianin, si penalizim të marrë që nga java e kaluar bashkë me Julianën. Valeri i kërkon që të shkojë dhe të zgjoje edhe Julianën, pasi penalizmi nga Vëllai i Madh është dhënë për të dyja vajzat. Ndërsa Jona refuzon që ta zgjojë Julianën dhe vendos që të shkojë dhe t’ia çojë vetëm. Ajo shkon në dhomën e gjumit dhe afrohet te krevati i Meridianit dhe pasi e zgjon, e vë në dijeni se mëngjesi për të është gati, ndërkohë që i bën të qartë se nuk e ka zgjuar Julianën dhe ka vendosur t’ia çojë e vetme. Meridiani, ndërkohë, vazhdon të flejë ende.

Meridiani e Valeri: “Më i rrezikuari për të dalë, Arditi; Nevila e Mikela nuk dalin”

Pas përfundimit të provës së koshave, Valeri shkon afër Meridianit e të dy fillojnë të bisedojnë me njëri-tjetrin rreth të nominuarve dhe banorit që është më i rrezikuar për të lënë shtëpinë këtë javë. Valeri mendon se Arditi është banori më i rrezikuar, pasi sipas tij, Katrina është më e ingranuar në situata të ndryshme të ndodhura në shtëpi. Për sa i përket Nevilës e Mikelës, ai mendon se nuk janë aspak të rrezikuara për ta lënë shtëpinë. Ndërsa Meridiani mendon se Katerina në të shumtën e kohës flet kot, por të paktën bëhet protagoniste dhe i ndihet zëri nëpër shtëpi, ndryshe nga Arditi. Valeri nuk mendon se Nevila rrezikon eliminimin, por thotë se herë pas herë ka vënë re frikë në sytë e saj. Meridiani e justifikon këtë frikë për faktin që ajo është nominuar për herë të parë dhe nuk e di se si mund ta përballojë. Ndërsa Valeri mendon se të gjithë duhet ta mendojnë eliminimin si diçka normale, por njëkohësisht të kenë siguri në vetvete se nuk mund të dalin. “Unë s’besoj se dalin këto të dyja se Nevila ka qenë aktive”, shprehet Meridiani. “Nevila merr pjesë në lojë dhe ndikon në marrëdhënie me të tjerët. Ajo është personi i fundit që mendoj se mund të dalë”, shprehet Valeri, ndërsa pas saj thotë se edhe Mikela nuk mund të dalë gjatë kësaj jave. Valeri thotë se Arditi mendon që këtë javë më e rrezikuara është Katerina. Ndërsa Meridiani i thotë se Arditi është shprehur se më të rrezikuarit janë ata të dy, pra Arditi dhe Katerina. “Kjo dihet”, ia kthen valeri, duke përjashtuar nga mundësia për t’u eliminuar Nevila e Mikela.

Debate dhe sqarime

Një pjesë e banorëve, bisedojnë në sallon për lojërat dhe strategjitë. Gjatë bisedave të tyre, Valeri i tregon Jonës për qejfmbetjen e tij, ndaj një fjale që kishte thënë Mikela kohë përpara, të cilën ai e kishte marrë personale. Jona i sugjeron të shkojë dhe të sqarohet me Mikelën, pasi ajo mund t’i japë shpjegimin e saj dhe ai nuk ka përse të jetë i keqkuptuar me të. Valeri i thotë se dikur, ajo ka folur për ‘Hitlerin dhe të shoqen e tij', në një kohë kur tema që po diskutohej ishte homoseksualiteti dhe mënyra si e kishte thënë, ishte duke provokuar Valerin. Ai shpjegon se ajo nuk i ka thënë asgjë të drejtpërdrejtë, por nga mënyra se si i lidhi temat atëherë, ai kishte kuptuar tjetër gjë. Jona vazhdon t’i përsërisë, se do të ishte mirë të fliste me të dhe jo të mendonte gjërat sipas kokës së tij. Valeri ngulmon tek loja që ajo bën, pasi veprimet e saj i duken shumë të kamufluara. Jona i shpjegon se Mikela është një vajzë me eksperiencë dhe loja e saj do të jetë ndryshe nga ajo e Valerit. Ata vazhdojnë të flasin për ngjarje të kaluara, duke i lidhur me situatat brenda shtëpisë. Lori i bashkohet banorëve, duke nisur sërish të grindet me Valerin, për të njëjtën temë. Ata tentojnë të sqarohen, por pa sukses, duke e ngjitur diskutimin sërish në nivel debati mes tyre.

Bisedojnë për buxhetin; Matilda qan...

Banorët diskutojnë në lidhje me buxhetin dhe keqmenaxhimin që bëjnë shpesh herë. Meridiani i thotë Mikelës se është i gatshëm që të dhurojnë një pjesë të buxhetit tek fëmijët në nevojë, duke kujtuar se kohë më parë, ai kishte bërë edhe një debat me Valerin, i cili e kishte kundërshtuar se sasia e lekëve që mund t'iu dhurojnë është shumë e vogël për t'iu hyrë në ndihmë. Nga ana tjetër, Juliana dhe Lori flasin në lidhje me dëshirat dhe nevojën e shume asortimenteve që iu duhen dhe shpesh herë nuk i kanë marrë, duke nisur të bëjnë llogaritë për buxhetin e radhës. Ndërkohë në oborr, Meridiani shpreh edhe njëherë gatishmërinë e tij për të dhuruar 50% të buxhetit, duke ia shprehur këtë gjë Visarit dhe Mikelës, e cila gjithashtu ra dakord, duke u këshilluar që pjesën tjetër të buxhetit ta harxhojnë për ushqime bazike dhe të mos e shpërdorojnë. Matilda del në oborr, duke u ulur vetëm në shezllong. Ajo nis të qajë. Enkelejdi dhe Visari të cilët e vërejnë këtë gjë, i shkojnë afër, duke nisur ta qetësojnë dhe t’i qëndrojnë afër, duke e këshilluar të mos mërzitet. Visari e pyet nëse mërzitja e saj vjen prej daljes së Fatjonit. Ajo e mohon, por ata nuk e besojnë, duke vazhduar ta qetësojnë dhe t’i këshillojnë të bëhet e fortë dhe të mos e lëshojë veten.

Loja e tretë: Mbledhja e të brendshmeve

Vëllai i Madh përgëzon ekipin fitues, duke i njoftuar nëpërmjet një zarfi që u lexua nga Jona, se loja e radhës, do të jetë individuale. Pesë banorët e mbetur në lojë ende, do të bëhen gati për një tjetër sfidë. Banori që brenda përfundimit të dy këngëve do të çojë në dhomën e ndenjjes më shumë të brendshme, shpallet fituesi i garës së sotme. Banorët meshkuj do të gjejnë sa më shumë të brendshme femrash dhe anasjelltas. Banorët që janë jashtë loje, nuk duhet të ofrojnë asnjë lloj ndihme, por mund të qëndrojnë si spektatorë. Banorët garues nuk mund të marrin të brendshmet e tyre. Ai banor që mbërrin i pari në dhomën e ndenjjes, sinjalizon fitoren e tij, duke i rënë borisë. Banori fitues do të fitojë edhe një bonus të rëndësishëm, për të premten e spektaklit. Pas njoftimit, banorët garues u nisen me vrap drejt dhomave të gjumit për të zbrazur gjithë dollapët e banorëve të tjerë. Meridiani është i pari që doli, duke zbritur shkallët më një ‘super bark’, pasi i kishte futur të gjitha të brendshmet poshtë bluzës. Nevila gjithashtu kishte marrë një sasi të konsiderueshme, ndërkohë që vajzat e tjera hasën vështirësi për të gjetur, ndryshe nga djemtë që e patën më të thjeshtë. Banorët u mblodhën në sallon duke nisur numërimin. Nevila kishte arritur të mblidhte 30 palë të brendshme, ndërkohë që Valeri numëroi plot 34 palë, Jona dhe Juliana kishin më pak se të gjithë, ndërsa fitues doli Meridianin, me 66 palë të brendshme.

Loja e dytë: Krijimi i fjalisë

Nevila lexon lojën e dytë për banorët. Sipas saj, të dhjetë lojtarët fitues duhet të ndahen në dy ekipe (ekipi i verdhë dhe ekipi jeshil), sipas ngjyrës së monedhës që kanë gjetur. Vëllai i Madh i ka vënë në dispozicion dy trarë ekuilibri dhe nga pesë bluza me germa që krijojnë disa fjalë të ndryshme. Pasi të jenë ngjitur në trarët e ekuilibrit me bluzat veshur, ata duhet të dëgjonjnë përshkrimet sipas fjalorit shqip-shqip, të fjalëve të ndryshme që formohen me këto germa. Të dyja grupet duhet të ngjiten mbi trarin përkatës sipas radhës së fjalës ‘R I D E N’. Banorët duhet të kenë kujdes dhe të dëgjojnë me vëmendje shpjegimin e fjalës që duhet formuar. Ata duhet ta gjejnë fjalën në fshehtësi, duke u konsultuar me pjesëtarët e ekipit. Pas kësaj, lojtarët duhet të zhvendosen mbi tra për të formuar fjalën përkatëse. Nëse dikush prek me duar traun e ekuilibrit, i fal një pikë ekipit kundërshtar. Nëse ndonjëri prej lojtarëve rrëzohet nga trau, skuadra kundërshtare merr sërish një pikë. Pasi skuadra formon fjalën e kërkuar, lojtari më pranë borisë i bie asaj, duke njoftuar fitoren. Ekipi që do t’i bjerë i pari borisë, merr një pikë. Pas kësaj, lojtarët e çdo ekipi qëndrojnë në pozicionin e fjalës që kanë formuar, për të vazhduar me formimin e fjalës pasardhëse. Pas leximit të zarfit, banorët shkojnë nëpër dhoma, ku vishen me bluzat përkatëse, për të fituar lojën. Të dyja skuadrat hipin sipër trarëve, ndërkohë që Arditi dhe Katerina lexojnë përshkrimet e fjalëve që duhen formuar. Ekipi i verdhe gjen fjalën e parë, duke fituar pikën e parë me fjalën ‘Rendi'. Loja vazhdon duke çuar në avantazh ekipin jeshil dhe duke e nxjerrë atë fitues me fjalën ë fundit të gjetur, që ishte ‘Erind’.

Loja e parë: Në kërkim të thesarit

Meridiani lexon zarfin që u dha nga Vëllai i Madh. Ai u komunikoi banorëve se sonte ata do të luajnë disa lojëra. Njëra prej tyre ka të bëjë me kërkimin e thesarit. Në dhomën e ndënjjes dhe në kuzhinë janë fshehur 10 monedha-disqe të vegjël, të verdhë dhe jeshilë. Ata duhet të kërkojnë kudo. Kush gjen një monedhë, kalon në raundin e dytë të lojërave. Pasi ka gjetur thesarin e tij, banorit i ndalohet të kërkojë apo të ndihmojë shokët. Loja nis me rënien e gongut dhe përfundon me gjetjen e monedhës së dhjetë dhe të fundit. Me rënien e gongut banorët nisin lojën, duke kërkuar në gjithë shtëpinë. Gjatë kërkimit të tyre ata arritën të gjejnë menjëherë 5 monedhat e para. Të gjithë ata që kishin gjetur monedhat u ulën në divane, duke pritur pjesën tjetër që kërkonte nëpër shtëpi. Valeri e gjen monedhën e tij brenda spinaqit në frigorifer, duke ia komunikuar edhe banorëve të tjerë, të cilët nisën të kërkonin më imtësisht. Monedha e fundit u gjet nga Nevila. Me gjetjen e të gjitha monedhave, ata mblidhen në sallon të gjithë, në pritje të një komunikimi të dytë nga Vëllai i Madh. Gjatë kohës që prisnin nuk munguan edhe debai mes Lorit dhe Matildës, duke përfshirë më pas edhe Jonën dhe Katerinën.

Debat mes Lorit dhe Visarit

Visari dhe Lori diskutojnë në lidhje me një ‘gjest’ që ai ka bërë, që sipas Lorit ishte ofendues kundrejt saj. Ata vazhdojnë të diskutojnë ashpër me njëri-tjetrin. Lori i kërkon arsyen, ndërkohë që Visari shpjegohet se nuk kishte asgjë me të. Lori vazhdon të ngulmojë se ai e ka bërë për të ngacmuar atë, ndërkohë që ai nuk pranon të ketë bërë diçka për të ofenduar Lorin. Diskutimi i tyre vazhdon shumë gjatë në të njëjtën linjë. Lori e akuzon se ai është ‘kalama’ duke vazhduar t’i kërkojë sqarime. Visari largohet nga debati i saj, në mënyrë që të mos e zgjasë, pasi atij i dukej i pavend. Lori qëndron në sallon e vetme, ndërkohë që Valeri i afrohet duke e pyetur se çfarë kishte. Ajo mundohet t’i sqarojë se çfarë kishte ndodhur. Pasi e dëgjon versionin e saj, Valeri e shikon si një dramatizimin të situatës për ta kthyer në një lojë shumë të mirë për të tërhequr vëmendjen tek vetja. Lori mundohet t’i shpjegojë se ajo ka të drejtë të reagojë ashtu, por duket se Valeri nuk besoi asnjë fjalë të saj, duke i thënë t’i jepte fund atij diskutimi.

Apr 19, 2014

Meridiani dyshon se Arditi është çift

Banorët për një kohë të gjatë merren me hartimin e buxhetit të javës. Herë pas here ata debatojnë me njëri-tjetrin. Debatet fillimisht i nis Meridiani i cili për çdo pyetje që bëjnë banorët, në lidhje me sasinë e nevojshme të ushqimeve u thotë “nuk e di, Fatjonin është marrë me buxhetin”. Ardidi i thotë se ai mund ta bëjë buxhetin, por ata duhet ta marrin seriozisht sepse mund të duhet përsëri ta rishohin, pasi kanë frikë se nuk i bëjnë si duhet llogaritë. Më pas ata bien dakord që të gjithë bashkë të hartojnë listën e produkteve që do t’u nevojiten këtë javë qëndrimi në shtëpi. Më pas banorët shpërndahen përsëri nëpër grupe dhe fillojnë të diskutojnë për tema të ndryshme. Meridiani si zakonisht shkon në kuzhinë dhe fillon të gatuajë. Aty shkon në një moment edhe Arditi për të pirë kafe dhe meridiani fillon që ta ngacmojë. “ e ke një sekret ti, më duket se ti je çifti këtu brenda” i thotë Meridiani Arditit, ndërsa ai qesh. Arditi tashmë është vërtet një nga çiftet e shtëpisë, pasi ai dhe Juliana kanë krijuar një lidhje dashurie mes tyre, por këtë gjë banorët nuk e dinë. Meridiani dyshon, ashtu si edhe të tjerë, pasi disa javë më parë banorëve u është thënë se dy prej tyre kanë një lidhje të afërt mes tyre. Ende nuk është zbuluar asgjë, por banorët vazhdojnë të dyshojnë.

Buxheti i javës, 50% e tij shkojnë për fëmijët në nevojë

Banorët janë shpërndarë nëpër ambiente të ndryshme të shtëpisë dhe gjatë kësaj kohe bisedojnë me njëri-tjetrin për tema të ndryshme. Në një moment Matilda që vjen nga dhoma e rrëfimin me një zarf në dorë, u kërkon banorëve që të mblidhen të gjithë në dhomën e ndenjies sepse ka ardhur. Matilda nis të lexojë zarfin e buxhetit të kësaj jave. Banorët edhe pse fituar 100% provën e buxhetit, sipas vendimit të tyre për të çuar 50% të buxhetit në ndihmë të fëmijëve në nevojë, do të kenë mundësinë që të shfrytëzojnë për nevojat e tyre javore, vetëm 50% të buxhetit. Pas leximit të zarfit, banorët nisin që të diskutojnë për produktet që do të blejnë. Fillimisht banorët diskutojnë se kush do të merret me hartimin e listës së produkteve që do të blejnë. Më parë është marrë Fatjoni me hartimin e buxhetit, por tashmë ai nuk është më pjesë e shtëpisë dhe banorët duhet të marrin pjesë të gjithë në hartimin e buxhetit të javës. Kështu për një kohë të gjatë banorët merren me hartimin e buxhetit dhe diskutojnë për produktet që do të blejnë dhe herë pas herë shprehin secili dëshirat e veta.

Katerina e Valeri kërcejnë në shi,- Jona ironizon Katerinën

Valeri dhe Katerina për një kohë të gjatë kërcejnë me njëri-tjetrin në oborr edhe pse bie shi. Është ftohtë dhe ata lagen e bëhen qull duke kërcyer me muzikën në sfond. Në një moment Katerina vendos të lahet në pishinë. Ajo hidhet me gjithë rroba në pishinë dhe fill pas saj në pishinë hidhet edhe Valeri. Meridiani që i sheh u thotë se duhet të dalin nga pishina sepse është shumë ftohtë dhe mund të sëmuren. Valeri dhe Katerina nuk i dëgjojnë fare këshillat e Valerit dhe vazhdojnë të argëtohen duke kërcyer me rroba të lagura nën shiun e ftohtë. Ndërkohë që Katerina dhe valeri argëtohen, banorët e tjerë i9 shohin nga brenda shtëpisë dhe qeshin me ta. Jona vazhdon të shaje me ironi Katerinën për veshjen, çizmet e mbushura me ujë dhe për mënyrën se si ajo kërcen. Më pas Jona komenton për disa minuta sjelljen e Katerinës dhe Valerit, bashkë me Mikelën. Dy vajzat diskutojnë rreth shprehjes ‘s’dua të dal, se kam akoma për të dhënë”. Mikela thotë se kjo është një shprehje e gabuar sepse nëse kanë diçka, banorët duhet ta japin, ta tregojnë dhe jo të thonë vetëm fjalë. Jona ndan të njëjtin mendim me të dhe ironizon Katerinën duke thënë “po bën diçka të re kjo se ka thënë se kam shumë për të dhënë akoma dhe po mundohet të japë diçka”. Jona më pas i vazhdon ironitë për Katerinën me Visarin dhe Arditin duke thënë “nuk jam aq e zgjuar sa Katerina”. Ndërsa ajo flet kundër saj, Katerina vazhdon të argëtohet duke kërcyer në shi, bashkë me Valerin.

Katerina:Si po të duket pa Fatjonin?,- Valeri: E kam Fatjonin këtu brenda

Katerina dhe Valeri ndodhen në oborr dhe Katerina e pyet Valerin “si po të duket pa Fatjonin. Valeri qesh dhe i thotë Katerinës “e kam Fatjonin këtu brenda” dhe i tregon një bluzë të Fatjonit që ai ka veshur. Katerina fillimisht mundohet që ta provokojë Valerin të flasë për Fatjonin, por ai i thotë se ato që ka folur me Fatjonin ju përkasin atyre dhe nuk ka pse t’i diskutojë me banorët e tjerë. “Është e vështirë që të gjesh një tjetër si Fatjoni këtu brenda” thotë Valeri duke treguar se ai ka pasur një miqësi të mirë me Fatjonin. Katerina i thotë më pas “është djalë shumë i mirë, por e penalizuan gjëra të tjera”. Valeri i thotë katerinës se atij i vjen mirë që dëgjon fjalë të mira pikërisht nga Katerina për Fatjonin. Katerina i thotë Valerit se Fatjonin e kanë penalizuar njerëz të tjerë duke iu referuar kështu Matildës dhe Jonës. Valeri i thotë se pak rëndësi ka se çfarë e ka penalizuar, apo si, Fatjonin. Për Valerin e rëndësishme është miqësia që ai pati me Fatjonin. “Jam i lumtur që gjatë rrugës drejt thesarit, takova një mik të çmuar si Fatjoni” thotë Valeri. Më pas Katerina pyet Valerin se çfarë mendon ai për gjestin që ajo bëri ndaj Fatjonin për të cilët u debatua e diskutua gjatë brenda shtëpisë. Valeri i thotë Katerinës se ajo është shumë e zgjuar, por gaboi duke luajtur me xhelozinë e Matildës. Sipas Valerit kjo nuk është e drejtë, ndërsa Katerina thotë se ajo e bëri atë gjest sepse Fatjoni nuk reagonte, por vetëm Matilda. “Mua personalisht, nuk më ka pëlqyer ajo skenë” i thotë Valeri Katerinës.

 
| Owned by MMG |